Envoy To The Clerk’s Tale, ll. 1177-1212, and The Host’s Words, ll. 1212a-1212g

Read by Alan Baragona
as edited by Larry Benson
in  The Riverside Chaucer, Third Edition
Houghton Mifflin
(text reproduced below with permission)

Envoy to the Clerk’s Tale, ll. 1177-1212g in MP3 format

Lenvoy de Chaucer

Grisilde is deed, and eek hire pacience,
And bothe atones buryed in Ytaille;
For which I crie in open audience
No wedded man so hardy be t’ assaille
His wyves pacience in trust to fynde
Grisildis, for in certein he shal faille.

O noble wyves, ful of heigh prudence,
Lat noon humylitee youre tonge naille,
Ne lat no clerk have cause or diligence
To write of yow a storie of swich mervaille
As of Grisildis pacient and kynde,
Lest Chichevache yow swelwe in hire entraille.

Folweth Ekko, that holdeth no silence,
But evere answereth at the countretaille.
Beth nat bidaffed for youre innocence,
But sharply taak on yow the governaille.
Emprenteth wel this lessoun in youre mynde,
For commune profit sith it may availle.

Ye archewyves, stondeth at defense,
Syn ye be strong as is a greet camaille;
Ne suffreth nat that men yow doon offense.
And sklendre wyves, fieble as in bataille,
Beth egre as is a tygre yond in Ynde;
Ay clappeth as a mille, I yow consaille.

Ne dreed hem nat; doth hem no reverence,
For though thyn housbonde armed be in maille,
The arwes of thy crabbed eloquence
Shal perce his brest and eek his aventaille.
In jalousie I rede eek thou hym bynde,
And thou shalt make hym couche as doth a quaille.

If thou be fair, ther folk been in presence,
Shewe thou thy visage and thy apparaille;
If thou be foul, be fre of thy dispence;
To gete thee freendes ay do thy travaille;
Be ay of chiere as light as leef on lynde,
And lat hym care, and wepe, and wrynge, and waille!

Bihoold the murye words of the Hoost

This worthy Clerk, whan ended was his tale,
Oure Hooste seyde, and swoor, “By Goddes bones,
Me were levere than a barel ale
My wyf at hoom had herd this legende ones!
This is a gentil tale for the nones,
As to my purpos, wiste ye my wille;
But thyng that wol nat be, lat it be stille.”